Overtourism: turism de massa?
Dal vet al massa, dal vet uman a la massa umana e più avisa al turism de massa. L é i argomenc de la ultima doi edizions del Simposie de scultura Toni Gross, che vegn endrezà ogne doi egn.
Del 2024 defat, l diretor artistich Pierangelo Giacomuzzi aea cernù »vöit«, chest an l desch de lurier metù ensema da la Scola Ladina de Fascia, l Comun de Sèn Jan, l’Union di Ladins e l Comun General de Fascia à pissà de propor zeche che aon sot i eies ogne an de più, soraldut te la sajon da d’istà: l overtourism, n turism de massa en tenù desche na gran cantità de jent, ma ence te sia acezion più sotila, n turism che é de massa? N titol che i partezipanc podarà interpretèr aldò de sia vijions e de sia idees.
Muda l titol e muda ence la formula. Per la 7^ edizion del Simposie de scultura no se vedarà più artisć lurèr te la postazions enjignèdes anter Poza e Vich (chest an vegn tout ite ence l paisc de Vich) ma chest’outa i protagonisć sarà i studenc. L grop de endrez, con dant fora l Sorastant Federico Corradini, che per chest nef Simposie ge zedarà l temon a la neva Sorastanta Mattea Eccher, à pissà de se oujer a la scoles de èrt de la region e no demò. E coscita l é stat envià i studenc del Liceo Artistich G. Sello de Udin, del Liceo delle Arti de Trent e Rorei ‘Vittoria-Bonporti-Depero’, del Liceo artistich Pascoli de Busan e del Lizeum d’ert Cademia de Ortijei, ensema ben segur ai studenc del Liceo Artistich de la Scola Ladina de Fascia.
L Simposie l é nasciù con l obietif de fèr crescer la sensibilità envers l’èrt, te n paisc che da passa 80 egn ge dèsc alberch a na Scola d’èrt che à fat crescer generazions de artisć e olache l é nasciù Toni Gross, artist e alpinist, ensegnant e diretor de la medema scola. Proprio per chest l é stat natural pissèr de tor ite i studenc artisć che te chesta ocajion arà l met de lurèr apedejù, de se baratèr esperienzes, de se cognoscer miec e envièr via colaborazions neves che segur podarà crescer tel davegnir.
Amò apede chisc studenc arà l met de se confrontèr ence con doi artisć de nonzech: Giar Lunghi e Sara Andrich che, apede a zipièr na sia opera, i jirà fora anter la postazions per veder coche laora i gropes de studenc e ge dèr si consees.
L program
La 7^ edizion del Simposie Toni Gross sarà a Sèn Jan dai 14 ai 18 de setember. En lunesc ai 14 i studenc tacarà a lurèr sun sia operes tel zenter di paijes de Poza e Vich. En jebia ai 17 da les 20:30 te sala de Comun de Sèn Jan sarà na meisa torona sul tem Overtourism: turism de massa? con la partezipazion de Matteo Righetto, Michil Costa e Nicolò Weiss e la moderazion de Mirella Florian. En vender ai 18 de setember da les 10:30 vegn fat la restituzion de la operes te Liceo Artistich con n picol marindel.
Monica Cigolla, La Usc di Ladins 33 del 2026