Mostra del artist ladin Fernando Brunel – Imprescions

L’Union di Ladins de Fascia enauda ai 8 de aost la neva mostra Imprescions de Fernando Brunel, che restarà fora enscin ai 23 de aost con orarie 16-19.

Brunel conjobia esperienza, teritorie e identità. La Dolomites per el no é biot motif iconografich, ma lech de partegnuda, te chel che natura, memoria e cultura vif adum e se avenea una con l’autra. La Ladinia che vegn fora da sia operes l é na Ladinia vivuda dì per dì, conscidrèda con la sensiboltà de chi che ge vel ben a sie lengaz, sia tradizions e sia istoria.

Brunel à studià a la Scola d’Èrt de Poza e do col maester Igi Pederiva. L depenjer en plein air é per el l fondament medemo de sia enrescida. I depenc a èga e a elech i interpretea la lum, la sajons e l’atmosfera de la Dolomites tras n stel personèl, bon de mudèr lesc cognosciui te emozions, recorc e sens de partegnuda.

Da passa mez centené Brunel se dèsc ju con gaissa per la valorisazion del lengaz e de la cultura ladina tras studies, publicazions, scomenzadives e encèries istituzionèles. L medemo leam con sia tera vegn fora te la rafegurazions de la mèscres del Carnascèr fascian, te la operes zipièdes e te la decorazion tradizionèla de la mobilia a la fascèna.

Imprescions ne conta de n artist che depenc no demò chel che l veit, ma soraldut chel che l recognosc desche pèrt de sia identità. Sia operes auza fora na Ladinia autentica, olache l paesaje doventa memoria condividuda e patrimonie culturèl da stravardèr e valorisèr.