En sabeda ai 3 de otober l Ladiniatour26 a Cianacei
Pian pian fenesc via l lurier de endrez de la 9a edizion dla Ladiniatour, la lingia de conzerc te la valèdes ladines olache i protagonisć l é proprio ciantautores e bands de la Ladinia.
Chest’outa da veder e scutèr su sun paladina l é en dut 5 formazions: l grop fascian PopCorner, la jona ciantarina Ines e Julian and the D-Street Band da la Val Badia, Nëusdoi e Sun Sëida da Gherdena. Apedejù chisc cinch artisć sarà per vigni conzert n “special guest”; a Ortijei sonarà i The Zanzis, te Fascia Le Lingue morte e a La Ila l grop Frak. La moderazion sarà de Jasmin Ferdigg.
La tour encomai tradizionèla scomenzarà a Ortijei, dapodò la jirà a Cianacei e ultim dì a La Ila; l gran event musical de musega moderna ladina l sarà dai 2 ai 4 de otober del 2026
Chesta manifestazion interladina la é stata endrezèda da l’Union Generela di Ladins dla Dolomties per la pruma outa del 1989, l’ultima edizion la é stata del 2024. L fin de chest gran event l é chel de ge dèr na soscedèda al ciantèr ladin con musega moderna e na ocajion dantdaldut per i gropes ladins de se mostrèr tedant a n publich maor, se fajan na bela esperienza sun paladina. Se pel dir che la Ladiniatour l é stat la gran promotora per la musega moderna ladina, ge dajan motivazion e gaissa e soraldut snait de tor ca la rejonèda de la mèra per sia cianties.
Na gran novità de chest an l é la ciantia finèla “i sun l’umanité”. L se trata de na compojizion dal test fon e universèl, che trasmet n messaje potent: l’umanità desche leam autentich anter la persones, sorafora la desferenzes, la origines e i confins.