Col cher per la jent: la cura del auter

Ence chest an l é ruà l temp de se fermèr n moment do l biteboi de la sajons da d’invern e da d’istà e de rengrazièr desche vigni an na realtà de noscia val. Chest an l’Union di Ladins de Fascia à dezedù de ge sporjer n develpai a duc i volontadives de la picola sociazions de Fascia che se dèsc ju per la cura de la persona. Ence te noscia val tropes é la fragilitèdes sozièles, economiches e psicologiches che à debesegn de esser didèdes fora: apede a la gran sociazions desche la Crousc Biencia e la Crousc Checena, i Studafech, l Socors da mont e coscita inant, l é n bel grum de gropes che se cruzia de ge stèr apede a la persones en dificoltà, che se tol cura del auter a na vida ativa e preziousa.

En vender ai 9 de otober al Chino de Cianacei da les 17:00 duta la comunanza é donca envièda a ge fèr festa a chisc volontadives. Auter moment emportant del domarena sarà la litazion del nef Consei de l’Union: duc i sozi en regola col tesserament (se pel ence renovèr l tesserament diretamenter ló) é envié a vegnir a dèr ju sia stima. Ence en lunesc ai 12 de otober se pel litèr l consei nef te senta de l’Union de Fascia a Sèn Jan, da les 8:30 fin les 12:30 e da les 15:00 fin les 19:00. Vigni sozio pel aer fin a 3 deleghes.
A enterzèr ite l event sarà la musega del Gruppo folk Val di Fassa de la Scola de Musega Il Pentagramma.

La Festa se serarà su en domenia ai 11 de otober co la messa te gejia del Sacro Cher a Cianacei da les 10:30 con partenza de la defilèda con la Musega Auta Fascia da Piaz de Comun da les 10:00. Siede dutes e duc envié de cher!