Neva-Fascia: doi comunanzes adum

I raporc anter Fascia e Neva va en do tel temp veior de nesc crosaves. L inom enstes de Neva, chiamèda enscin al XIX centené Nova Latina o Nova Ladina, conta de n passà leà a dopia fun coi ladins, situazion che, enceben la spartijon te doi provinzies desvalives e la desferenza de lengaz che se fèsc inant semper più fona, seghita a jir inant ence anchecondì te desvalives ciampes.

Belimpont l’Union di Ladins se à pissà de endrezèr n event a sotrissèr e zelebrèr i raporc strenc de chesta doi comunanzes che sauta fora sot desvalives aspec ence tel ciamp de la cultura: da la conspartijon di mic e de la lejendes leèdes al Rosengarten, da la toponomastica veiora e a trac desmentièda che ne conta de n teritorie stat ladin, a la vita enterzèda de la doi comunanzes tel passà.

Chisc i temes che vegnarà portà dant dai trei reladores de la scontrèda: Ulrike Kindl, Fabio Chiocchetti e Katin Pattis. Ma no demò: sarà ence na ocajion per na fradaa de musega anter la Musega da Vich e l Singkreis Welschnofen te na cornisc da marevea sibie daite che defora: te dedant la crepes del Latemàr, te dedò l Grop del Ciadenac e daite la gran sala del Hotel Gran (coscita i ge dijea al Grand Hotel); chesta l é n picol melaur architetonich con sia bela gran fenestres che dèsc sul parch del Hotel, l pianofort a couda, l aredament storich e l gran depent a elech del Ortles sul parei junfon la sala del pitor ingleis Edward Theodore Compton, che merita dalbon de esser vedù.

Endrezadores e sostegnidores del event l é l’Union di Ladins de Fascia, la Union Generela di Ladins dla Dolomites, Maria Trienbacher e Norbert Seehauser del Bildungsausschuss Welschnofen e l diretor del Hotel Gran Giandomenico D’Affuso. La scontrèda se sera su con n picol marendel enjignà su da La Volontadives da Vich. Siede duc envié de cher!