Mostra del artist ladin Lois Rottonara – ROTT

L’Union di Ladins de Fascia à cernù l paisc de Vich e più avisa l bel tobià del president Fernando Brunel a Val per endrezèr mostres de èrt de artisć ladins.

Se ponta via en sabeda ai 27 de jugn co l’inaudazion de la mostra Liëndes ladines dles Dolomites del artist badiot Lois Rottonara – ROTT da La Ila, che restarà averta enscin ai 25 de messèl duc i dis da les cater a les set domesdì.

Chest artist met ensema tradizion e contemporaneità tras sia pitura, sie zipièr e sia sperimentazion con materièi desvalives. Sia èrt troa tras ispirazion te la mitologia e te la cultura ladina e la mostra tel tobià de Val é belimpont dedichèda a la lejendes ladines. La doura de colores forc e de formes scempies con richiames a l’astrazion é carateristica de sia zifra artistica.

ROTT l é n artist cognosciù a livel internazionèl e l é n onor per l’Union poder endrezèr na esposizion de sia operes te Fascia.

La inaudazion, en sabeda ai 27 da les cinch domesdì sarà vidèda da la prof.ra d’èrt Lorenza Florian e endeletèda dal compagnament musical de Susy Rottonara. La mostra de ROTT aur na lingia de evenc artistics che l’Union se met dant de endrezèr ence ti egn che vegn tel tobià de Val, metù a la leta dal president Brunel belimpont per chest fin! La perferida artistica de chest istà jirà inant dai 8 ai 23 de aost co la esposizion de la operes de Fernando Brunel.