Mostra »Trois de Lum« e ujes averc te Moniaria

Ence chest an l’Union di Ladins de Fascia vel sporjer na ocajion per arvejinèr a la cultura ladina no demò la jent de Fascia, ma ence i ghesć che rua en feries. Te Ciasa de la Moniaria a Sèn Jan, te la bela stala veia jubas, resta amò fora la esposizion de fotografies de duta la Ladinia inaudèda da l’Union Generela di Ladins dla Dolomites tel Dì dla Unité Ladina. Se pel la veder duc i dis, da les 9 da doman fin les 6 da sera. Chesta mostra à abù dassen n gran aprijiament e paa la speisa passèr a ge vardèr.

Te la Ciasa de la Moniaria olache ’Union di Ladins de Fascia à sia senta, semper jubas enlongia la stala l é stat metù fora la seconda pèrt di retrat de la mostra ‘Trois de Lum’ e ence la publicazions per la ‘Festa del Liber Ladin’.

Ence chesta pèrt resta averta inant mesdì; se fossa serà se pel vegnir su te senta de l’Union per se fèr verjer: chi che vel vegnir a veder noscia senta, a vardèr noscia publicazions e domanèr informazions, i é semper benvegnui.

Na pèrt de la mostra ‘Trois de Lum’ te stala de la Ciasa de la Moniaria.