L Picol Prinz rejona ence fascian

Do n percors piutost lonch, segnà da pausses, reflescions e mudamenc, l’Union di Ladins de Fascia à portà a compiment l’edizion de ‘L Picol Prinz’ te la verscion per fascian, con la traduzion de Stefen Dell’Antonio Monech, tolan su con gaissa e mingol de emozion l’idea de Stefen de ge l dedichèr a Vigile Iori »Maester, ensegnant, scritor, ator e auter, ma più che dut amich prezious lator de valor e pensier che ge fèsc ben a la vita, a l’ènema e al cher.«

E apontin ajache Vigile l é stat om de scola, l é stat cernù de l dèr l fora adum con la Scola Ladina de Fascia, acioche i studenc posse lejer ence te nosc lengaz chest picol ma prezious libret che porta inant ideèi de pèsc, de amor, del rencurèr la picola robes, de amicizia, de responsabilità, e tel medemo temp recordèr ence l professor che é stat portador de chisc ideèi.

L Picol Prinz l é stat prejentà en mèrtesc ai 10 de firé tel Liceo Artistich a la prejenza de n bel grop de persones che se à binà per re cordèr l amich, l scritor, l ensegnant, l ator e regist, l defensor del ambient Vigile Iori, che l é stat per n muie de egn ence conseier de l’Union di Ladins de Fascia e l à dat e fat dalbon trop per noscia comunanza.

‘L Picol Prinz’ per fascian é da poder comprèr te senta de l’Union di Ladins de Fascia, a Sèn Jan.

Cianton de l’Union, La Usc di Ladins 6 del 2026