Gran Festa per i 70 egn de l’Union di Ladins de Fascia

L é encomai passà 70 egn da chel 19 de mé del 1955 canche su scomenzadiva de don Massimiliano Mazzel, del giudize Giacomo Jellici Mantino e de Simon Sommariva Tonolerchie ensema al notèr Rizzi, vegnia metù en esser con at ofizièl l’Union di Ladins de Fascia, desche sezion de l’Union Generela di Ladins dla Dolomites.

70 egn de gran batalies, recognoscimenc, momenc bie e manco bie che ne à portà a poder stravardèr tras leges e tuteles noscia cultura e nosc lengaz! Coluna mior rejon per fèr festa? Envion embendapò duta la comunanza en domenia ai 19 de otober a festejèr con nos i 70 egn de la Sociazion, ma no pa demò! A chest cedean toron se jonta ite ence l Benvegnù a don Mario Bravin che tel medemo dì l tolarà posses de la curazies de la Val de sot.

L program perveit da les 14:00 te gejia de Poza la messa grana de benvegnù a don Mario Bravin, nef piovan de duta Fascia; da les 16:00 a La Gran Ciasa de Soraga n curt moment istituzionèl per i 70 egn de l’Union di Ladins de Fascia e la premiazion del concors Let’s stick ladin!, da les 18:00 aperitif e cena a buffet su prenotazion e da les 20:00 sera de musega e bal con I Pazedins averta debant a duc.

Ve envion a ve enscinuèr ite al aperitif e cena dant dai 15 de otober. L cost é 20 euro per i sozi de l’Union e 30 euro per i no sozi. Prenotazions al 349 5291044, ence su Whatsapp o a chest link.