Chesta l é noscia bandiera

L é n temp rich a livel sportif e mediatich per nosc teritorie, e soraldut te chisc momenc l é emportant uzèr fora noscia identità ladina. Anter Marcialonga, garejèdes de livel mondièl e Olimpiades con sia focoles, ence Fascia la é sot l eie di media e se veit daperdut bandieres de ogne color, l é donca emportant che anter dutes, o miec per pruma, vegne uzà fora noscia bandiera ladina.

De chest vers se à moet ence l’Union di Ladins de Fascia, con n video olache l president Fernando Brunel envièa duta la jent a meter fora la bandiera ladina.

Chest ‘reel’ à abù n suzes straordenèr: te pec dis l se à vadagnà zirca 88.000 visualisazions sui social, passa 65.000 demò sun facebook, e l à abù passa 3000 ‘me pièsc’ e adertura passa 3750 interazions.

Numeres da marevea, e amò più da marevea l é stat la resposta de la jent de Fascia, che no l’à demò drucà n boton sul fonin o computer, ma en gran numer la se à durà la fadia de vegnir te senta de l’Union di ladins a Sèn jan a se proveder ite la bandiera ladina, tant che te pec dis les é states fenides dutes.

N bel segn, che fèsc sperèr dassen che la jent ge tegn a sia partegnuda ladina e a ge la moscèr a dut l mond.

N muie de jent à tout su l envit de l’Union tacan fora l simbol de noscia identità.

N compliment donca a dute e duc chi che à abù na pèrt per chest gran suzes, e per prumes a Fernando Brunel e Nicoletta Riz che se cruzia di social de l’Union e l’à abù chesta bela idea.

Lucia Gross, La Usc di Ladins 04 del 2026