70 egn de l’Union di Ladins de Fascia
Ai 19 de mé del 1955 l’Union di Ladins de Fascia vegnia metuda su ofizialmenter dedant al notèr Giovanni Rizzi. Per recordèr si 70 egn de storia, la sociazion à jà tacà con la pruma scomenzadives, che jirà inant fora per l an. Ai 12 de oril, dì de l’inaudazion de l’Aisciuda Ladina l era stat recordà la fegura de Danilo Dezulian dal Garber, militant storich de l’Union: te chela ocajion l Comun General de Fascia ge à dedicà la sala grana de la Ciasa de la Moniaria e l’Union à portà dant en curt l liber ‘Tal cher de mie cher’, che regoi la produzion poetica de Danilo dal Garber.
Chisc dis che vegn, apontin per l cedean de la fondazion de la sociazion, l é en program n auter event: ai 17 de mé ló dal Albergo Rizzi de Salin a Pera, l’Union metarà a jir sia radunanza generèla con duc i sozi e sarà ence la ocajion per fèr cognoscer miec la valuta del militant ladin ence desche poet, a Pera, te anter sia jent. Te chesta ocajion la publicazion vegnarà sporta a n priesc rebassà a duc i prejenc.
La radunanza pea via da les 5 domesdì con l president de l’Union Fernando Brunel che recordarà en curt i 70 egn de la sociazion. I sozi, che i pel fèr o renovèr la tessera ence chel medemo dì (al cost de 15,00 euro che dèsc derit a vantajes e rebasc), i podarà aproèr l bilanz consuntif del 2024 e vegnir metui en consaputa de l’ativitèdes pervedudes per chest an.
Da les 6 sarà la prejentazion del liber Tal cher de mie cher, olache con Fabio Chiocchetti del Goti, che à rencurà la publicazion, duc i arà l met de fèr n viac lirich de descorida de noscia tera ladina e ence de portèr dant i recorc che Danilo con si scric à soscedà.
L simbol storich de l’Union di Ladins de Fascia, atualisà per i 70 egn de la sociazion.
En ultima ai sozi ge vegnarà amò sport n belot don a recort di 70 egn de l’Union, e i podarà amò stèr adum en legreza con mingol de magnadiva da zacan enjignèda desche semper con cher e saer da chi de Salin.
Ve speton donca en sabeda ai 17 de mé ló dal Albergo Rizzi de Salin a Pera, e ve envion a e ve fèr sozi e ge stèr apede a noscia sociazion, che te 70 egn la se à semper dat ju per stravardèr la comunanza ladina, viventèr sie lengaz, cultura e tradizions e ge fèr vadagnèr deric emportanc che à fat più forta e rica noscia val, e che tropes no cognosc o i à desmentià.