L capuziner perdicadour de Fascia

Da Nadel dl 1929 à P. Lejio festejé a Badia sia Messa noela d’arjent.

P. Lejio Bernard ova perdiché sun i pergoi de dutes les gran zités talianes. Al ova l carisma dla faela tles perdiches, tl ensegnament y tl apostolat da preve, al mostrova gran degnité y creta. Al fova na personalité de gliejia reconesciuda y al mostrova na gran umanité. Nia debant ne vegnìvel dit che P. Lejio fova un di majeri perdicadours dla Talia. Cie che P. Leppich fova chi agn do la vera encà per i todesc é P. Lejio sté per i talians.

Gran studié y amich de duc

P. Lejio é nasciù ai 25 de messel dl 1882 a Gries, na vejinanza de Cianacei tla Val de Fascia. Siei genitours fova Luigi Bernard y Tarina Erardi. Lejio é vegnù batié tla gliejia de San Iaco a Ciampedel de Fascia con l inom de Giovanni Battista Maria. L pice Lejio (Alessio) ova n bon cef, na ment de fer acialin; an conta che al se recordova libri entiers adament; sia faela vegniva fora doucia y bela zenza renté iniò. Con 15 agn él jù te convent di capuzineri a Trent y dl 1898 tl seminar. Al à studié teologia a Trent y a Rorei y dl 1904 él vegnù consacré preve a Trent (Fascia é dal 1818 encà pro la diozesa de Trent). P. Lejio à ensegné dirit canonich, storia dla gliejia y dla “sacra eloquenza”; al é sté consiadour dl provinzial, diretour di studenc de teologia y enstes provinzial di capuzineri da Trent. Al à dé pro da mete tles zeles di convenc forniei per les scialdé. Al vegniva dit che “P. Lejio é sun pergol n lion, te confescional n agnel.” Da om de gran stude fajòvel pert dla “Accademia degli Agiati” da Rorei, na istituziuon de gran inom y pom. A Primiero àl metù su l ospiz.

L gran perdicadour

Ai fova de ot mutons tla familia Bernard, ma 3 é mor! da pici. Trei à podù studié y chel ne fova nia na cossa da puech per na familia da la stenta: Begnamin se ova dé ju con l turism, Angelo é vegnù Pater Liberato y é ruvé a San Paolo tl Brasile, Giuvani (P. Lejio ) à porté amour y onour de Fascia fora per duta la Talia; al à perdiché sun i majeri pergoi dles gran zités talianes.

Sies perdiches fova dolarata longes ma duc i scutova pro gen ajache al rejonova plu con l cuer che con la bocia. Al vegniva dit: Pater Lejio à l cuer de “Tarina badiota” che fova na persona dret ligherzina, ala ova dagnora na bona parola per duc. P. Lejio conesciova n grum de persones, gragn y pici, ric y pueri. Al fova conesciù te Badia, Gherdeina y Fascia: te Fascia fòvel nasciù, de Badia fova sia oma Tarina Erardi. Chi agn ruvòvel ca per la Val Badia nia puec moleri fascians y gonot se entreciòvel relazions che durova ence na vita.

Sojornanza a Badia

La oma de Pater Lejio fova Tarina, nasciuda ai 19 de fauré dl 1842 tla ciasa Al Daz a Pedraces; ala fova na fi a de Lipo Benizio Erardi y de Berbora Nagler (1812 – 1859) da Morin da Coz; l fre de Berbora, Nazio (1807 – 1896) fova n gran strion conesciù lonc y lerch; l auter fre Vijo (1808 – 1888) fova l paur da Morin, al ova dl 1851 compré da Felize Frenademez da Glira la ostaria Crëpa (Köfelewirt); ala giatova sen inom Ostaria Nagler. Vijo Nagler ova emparé via Ampez belijier y é sté ombolt de Badia. Te Gherdeina à P.Lejio perdiché n grumon de iadesc. Sia ultima perdica àl tegnù a Santa Cristina. Canche ameda Trinela Nagler da la Posta y sie om berba Vijo Pallestrong ova ti agn 30 fat la ciasa nueva a Pedraces se ova pater Lejio sciacaré ite da podei avei autaite n pice cuartier per podei vegnì de agost al fresch y sté n valgunes edemes pro la parentela de sia oma. Te veranda dijòvel i dis da laour messa. Les domenies d’agost perdicova P. Lejio a Badia y mai sot a 45 menuc. Y cie peis che al ti dova a sies paroles! Y con cie sbunf che ales brodolova fora dla joca! Al batova coi pugns sun pergol che nience i plu stufs ne ova la pesc da se endormedì. Al se aspetova che la jent tolessa su cie che al perdicova y l metessa via per l’edema en pratica.

P. Lejio ova a Pedraces y a Morin sia parentela. Al ne se contentova nia demé de saludé la jent ma chi che al conesciova deplù bajòvel a la taliana; de tel mutans y mutons jiva a se ascone sce ai l vedova adora assé; al ova na te gran berba blancia scialdi da tabach; al snufova sciche duc i capuzineri. P. Lejio ne sparagnova nia con dé la benediscion bist y out. Berba Iaco Irsara menova con sie taxi P. Lejio plu gonot d’isté via en Fascia a saludé i siei, i mutons dl Costamilagn, Paula y Lois, podova raité empera.

En bona recordanza

P. Lejio é i ultimi agn sté puere y al é mort a Trent en Santa Lizia dl 1957 do 60 agn de vita religiousa. Trueps badioc fova jus a Trent a sia sepoltura, tant en devozion l ài abù; al fova n toch de Badia! Don Mazzel scrivova dl 1958: “Al desplej che P. Lejio é mort ajache de chesta sort de patri él ju fora la semenza! “ P. Lejio é sté n bon fascian, n om de cuer y n bon ladin. Trueps badioc à P. Lejio en bona recordanza per sie humor, sia bona luna, sies perdiches, sies paroles de confort y sie carisma.

Lois Trebo/ev, La Usc di Ladins 2010/44