l lengaz ladin
«Fascegn! Recordave che te noscia bela Val aon de bel no demò i monts, la crepes, i pré, i bosc’, i scrignes da chi egn, l folclor, ma ence l ladin, che aon emparà da noscia mère e che no cognassane desmentièr»
-da la Prefazion a la pruma edizion de Sposc e Maridoc-
EDITORIA e cultura
L’Union di Ladins de Fascia la é nasciuda do da la Gran Radunanza di Ladins sun Sela del 1946, e la é stata costituida legalmenter con at del noter Giovanni Rizzi ai 19 de mé del 1955.
Aldò del art. 1 del Statut, la sociazion se cruzia de duc i problemes e i enteresc ladins e la vèrda de descedèr fora na coscienza ladina col defener e rencurèr l comun patrimonie de rejonèda, de cultura e de folclor.
L’Union di Ladins de Fascia la ge va do a l’Union Generela, la chier de binèr e tegnir ensema i ladins fascegn e la laora dessema coi etres ladins entorn l Sela.
La sociazion slèria fora publicazions de carater cultural e la endreza evenc e corsc de formazion. La se dèsc ju a sostegn de La Usc di Ladins te Fascia, te la produzion televijiva e radiofonica, coscita da ge dèr lèrga a nosc lengaz ence te formes desvalives.