Anter natura e alimentazion nasc “Saores de noscia Tera”
L’Union di Ladins de Fascia sostegn la difujion del lengaz e de la cultura ladina e da egn la fèsc pèrt de l’endrez de l’Aisciuda Ladina: la sociazion porta dant chest an l percors de laboratories “Saores de noscia Tera”
L projet “Saores de noscia tera” l’é nasciù per tor ite la comunanza de Fascia te n percors de enrescida curious e inovatif a la descorida di prodoc de noscia tera. La comunanza vegn envièda a tor pèrt a chest projet con l zil de svilupèr neva cognoscenzes e capazitèdes leèdes a la produzion, regoeta e respet de noscia tera. L projet prejenta, en colaborazion con joegn esperć e firmes de noscia Val, desvaliva ativitèdes outes a la jent del teritorie, per svilupèr ensema n percors dinamich per tor ite duc i partezipanc. “Saores de noscia tera” l’é n projet “technology free”: apontin te duta la scontrèdes no se durarà nesciun aparat tecnologich o informatich.
“Saores de noscia Tera” l’é nasciù con l’obietif de ge fèr cognoscer a chi che tol pèrt l mond cultural ladin, a na vida neva deldut moderna. I esperc chiamé a tor pèrt sviluparà percorsc teorich-pratics. Protagonisć de chest percors sarà l’azienda Fiores e Soreie de Sèn Jan e N’Outa de Ciampestrin. Ghesć sarà ence l chef Stefano Ghetta de L Chimpl da Tamion e l’espert micologh Luigi Casanova.
L projet perveit na lingia de scontrèdes a partir dal meis de mé per fenir via per l’uton de otober. Te la pruma scontrèda, perveduda ai 18 de mé domesdì via - da sburlèr sencajo ai 19 o ai 20 per l catitemp - Nadia Pitto de l’Agritur Fiores rejonarà de scirop de zucories, de coche se l fèsc e de duta sia preziousa proprietèdes. L’enconter se l farà a l’averta tel respet de duta la normativa sanitères.
Per ve enscinuèr podede ve oujer a noscia senta al 0462/764545, al 340/7765522 o manèr na mail a noscia direzion union@ladinsdefascia.it dant di 12 de mé. Max. partezipanc: 15 persones. Sion atives ence sun nesc canai social Facebook e Instagram e da anché ence sun WhatsApp (0462/764545). Per tor pèrt no vegn domanà nesciun paament ma se volede podede sostegnir l’atività de l’Union dajan na bonaman.
(Enscinuazion singola per scontrèda)
Siede envié duc a tor pèrt!