Ousc de Silvia Costabiei
Te na sfëssa scöra de Sas dla Crusc êl zacan n dragun dër da temëi. Al â le corp da bisca, iames lunges da de gran grifes y n per d’ares amples y stersces. La bocia cun döes linies de dënz lunc y spizá ê tan grana y leria ch’al ess sciafié da dlotí na porsona. Sc’al rovâ pro n chestian le mangiâl cun osc y pel. I famëis ne s’infidâ nia plü cun i tiers sö por munt, ciodiche le dragun â sternü incërch desgrazies y mort. Chësc malan de n tier rovâ cinamai jö te paisc y jô tles stales a scarzé bisces y armënc. La jënt ne s’infidâ gnanca plü dër da lauré ite les campagnes y se dorâ meseria y fan.
Laota viôl te Mareo, tl ciastel da Brach, le Gran Bracun, che ê plëgn d’ardimënt y â bele deplü iadi desmostré söa bravöra da manajé les ermes. Al â tan n bun edl y na man tan sigüda y frëma, ch’al odô y atocâ dal vider de ciastel n rehl che rodâ ia dal atra pert dla valada tl bosch de Plaies.
Le Gran Bracun s’â tut dant da delibré la valada dal dragun. Porchël ti âl vistí al ciaval la sela de San Iöre y ê raité itissö te chël bosch olache tröc â bele messü lascé la vita. Al ê defata rové sö sot la sfëssa, olach’al aldî buran le dragun. Ara n’â nia doré dî che le tier gnô fora. I edli slominâ sciöche füch. Cun la bocia daverta y dlun soflan gnôl foraijö cuntra le Bracun. Le brau ciavalier n’â nia pisimé, â tut süa erma y ti â trat n bot ti foran le cör. Le dragun ferí a mort svaiâ dal me, se brodorâ jö por le lastun y ê tosc tomé sura crëp jö.
Zënza fá n gran stöp adinfora s’un ê le Bracun indo jü a ciasa. Impormó tröc agn dedô â n famëi ciafé i osc dl dragun. Te chël post êl ciamó dan da püch na tofla da odëi. La jënt l’â lasciada fá por recordé la buna aziun dl Gran Bracun.
An cunta che… Liëndes ladines, adatèdes da Lydia Zingerle, Uniun Ladins Val Badia 2012, 2a edizion - N rengraziament a l’Uniun Ladins Val Badia