Ousc de Loreta Florian
Te noscia Dolomites i contèa che n'outa zacan l era n ream e l fi del re de chest ream l volea jir su la luna. No ve n fajé marevea se ence enlouta l era jent che proèa a jir su la luna a veder coche la é. Donca, chest prinzipe de la Dolomites volea jir su la luna e l à chiamà en aiut zeche vivèna che na net l l à fat ruèr su na spiza de crepa.
Candenó l é vegnù adalèrch na bela nigola duta lumenousa, l é montà su sta nigola e l é ruà su la luna. Lo l à troà la fia del re de la luna che se à enamorà de chest bel tous. I se à maridà e i é vegnui de retorn su la tera, ma a la bela sposa ge encrescea tant do l lumenous d'arjent de la luna che no la era bona de se la lascèr passèr. La volea se n jir de retorn su la luna.
L prinzipe, enamorà sche l gial da mont d'aisciuda, no l volea la lascèr se n jir, sessaben. La vivèna la é jita dal Salvan de Roda de Vael che l era na spezie de re dei Salvans; chest, didà dai zeberchies del Vaiolon, l é stat bon de ciapèr l lumenous de la luna e con chest l à intent de color d'arjent la crepes dut entorn. Coscita i monc che ge dijon Dolomites i pèr del color del arjent, sche l lumenous de la luna. La bela prinzipessa la se à lascià de pèsc e la é stata su la tera apede so om, e nos con chesta scusa aon i monc del color del arjent de la luna.
Gems da Poza, Arch. Mazzel, El color de arjent de noscia crepes