No ve pissà mai de lavèr voscia braa de pel, la se ruinassa dassen! La maces fèsc pèrt de la parbuda de voscia braa de pel che la moscia i segnes del temp. La braa de pel desche n camejot o na centa da om se la passa ence da na generazion a l’autra, per chest l é benfat saer coche l’à da vegnir rencurèda.

Rencurèr te armer:

  • no meté la braa de pel te n sach de nylon;

  • no te na cèvena olache l é tumech o freit;

  • piegà la braa e metela te armer, no la tacà su se possibol!

  • se la é tumia cognede vardèr che la se sie, dant de la rencurèr te armer;

  • no la fajé mai sièr te soreie;

  • onjela ite con n spray aldò (per braes de pel) acioche les reste molejines.

Tor fora la maces: se l é macia granes e volede proèr a les tor fora, l é miec durèr gomes per la pel che descancelea na macia zenza grazèr e ruinèr la pel: se les ciapa te la boteighes de braes de pel o ence te cheles che ven prodoc per la cura de la pel.

Se tinultima les é da fèr urgia dal crest, podede les portèr a fèr neteèr, olache se fèsc neteèr ence colec de pel, te na lescivèra spezialisèda per la pel. Ve costa anter i 50 e i 80 € inchecondì.

Braes vegiores: se voscia braa la é del giaf o del besaf e la é dura e secia, tolé – te na boteighes spezialisèda per la cura de la pel – n bon spray per la pel e onjé voscia braa vegiora. Vedarède che la vegn bela molejina.

I prodoc per la cura de la pel i troède te la boteighes spezialisèdes, ence te Busan veia, sotjù i portesc.

ClaudiaConta