facebook

L’edizion 2013 de SunS rejonarà ladin

La selezion de la Tèlia e de la Èlpes del LIET International, Festival internazionèl de la ciantia ti lengac de mendranza, sarà te Fascia ai 9 de november. En jebia ai 23 de mé a Moena la prejentazion de l’event

 
  
SunS 2013, l Festival de la ciantia ti lengac de mendranza per dut l raion de la Èlpes e de la Tèlia, rua te Fascia! Chest event, nasciù tel Friul de grazia a l’empegn de Radio Onde Furlane e al sostegn de l’ARLeF (Agjenzie regjonâl pe lenghe furlane), dò trei edizions endrezèdes a Udin e una dai romances ti Grijons, chest an l rejonarà ladin.

Gropes de musega pop-rock o ciantautores che fèsc pèrt de la mendranzes linguistiches de la Tèlia Svizera, Austria, Slovenia e Franzia tolarà pèrt, se sà ben con tòc te si lengaz de la mère, a n gran conzert che se tegnarà tel Teater Navalge de Moena en sabeda ai 9 de november che vegn.

I doi concorenc che se vadagnarà respetivamenter l pest de la jurìa e chel del publich i podarà tor pèrt al LIET International Song Contest, la finèla del Festival, che chest an la sarà a Bastia, te la Corsica, ai 8 de dezember, con la partezipazion de artisć da duta l’Europa.

L’event, endrezà dal Servije mendranzes linguistiches de la Provinzia Autonoma de Trent col suport tecnich-artistich de la sociazion “La Grenz” e la colaborazion del Comun de Moena, l’APT de Fascia, l’Istitut Cultural Ladin e La Usc di Ladins, vegnarà prejentà en jebia ai 23 de mé a Moena, te la senta de “La Grenz” (strada Saslonch 58) con la partezipazion di raprejentanc de la Region Friul, che per chesta edizion ge passa l testamonech a la comunanza ladina.

La sera, che arà desche protagonisć la musega e la mendranzes, pearà via da les 6 da sera con la conferenza stampa, olache i organisadores locai e furlegn prejentarà l Festival SunS.

Vegnarà prejentà l liber “La mê lenghe e sune il rock” de Marco Stolfo, furlan espert de musega e de mendranzes e dapò se podarà magnèr n bocon endèna che vegn moscià l filmant “Lingue in musica” de Marco D’Agostini, tout jù a Udin en ocajion del LIET International 2011.

Da les 9 da sera tacarà la “lezion-conzert” de Lino Straulino, ciantautor furlan che à vent l’edizion 2009 de SunS, ruan dapò al terzo post al LIET International.

 

Duc é envié de cher a tor pèrt.

 

ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy