facebook

Prest en stampa l numer set de Filoreflex!

I studenc di licees de Fascia porta dant n sfoi rès de reflescions su l’ambient e la politica, con n eie ascort envers l mond che, a cajon del coronavirus, l mudarà zenzauter

»La crisa più emportanta dò la seconda vera«: chestes l’é stat la paroles durèdes dal premier Giuseppe Conte per descriver la situazion de emergenza sanitèra che à tout ite no demò la Tèlia, ma l mond entriech. Apontin con chest pensier la redazion del sfoi Filoreflex di trei licees de Fascia à volù prejènter l nef numer.
Jà al scomenz de l’an de scola la joena redazion la se aea pissà de jir a analisèr più davejin l tema ambientèl e, apede a chest, sie leam con la politica: doi argoments articolé che à fat nascer da vigni student na reflescion fona e de valuta.
Te la sacotanta rubriches, en dut doudesc, l grop de joegn à portà dant sot desvalives ponc de veduda i argoments decliné sot n’atenta vijion de letura. Enceben te la redazion sie demò ot studenc, Erika Brigadoi, Micaela Caliendo, Desideria Degiampietro, Christian Dezulian, Matteo Riz, Nicoletta Riz, Giulia Stoffie e Mattia Valentini, con l didament de la ensegnantes referentes Marianna Cadorna e Tiziana Natalicchio, di professores Michele Scala e Thomas Zulian e de la tutor giornalistica de La Usc di Ladins Lucia Gross, l’é stat endrezà ativitèdes desferentes, anter chestes n concors fotografich e n sondaje avert ai compagnes.
La redazion ence chesta outa l’à cernù de rejonèr te più lengac, apede al talian engleis, todesch, spagnol, rus e fascian. No mencia la sezion che revèrda i projec de la Scola e n eie ascort l’é stat resservà ence a la costion politica en cont de ambient te Fascia.
Te la neva rubrica »Post Sriptum«, la redazion l’à jontà n reportage no pervedù, per chest l’inom particolèr, su l’endrez de la Scola ladina endèna l’emergenza sanitèra.
La grafica é stata fata da la professora del liceo artistich Fiorella Brunel. La publicazion del numer, che prest jirà en stampa, la vegnarà anunzièda sui social Facebook e Instagram de Filoreflex e de l’Union di Ladins de Fascia. L numer se l podarà tor debant.

Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy