facebook

Coi social per tor ite la neva generazions

L’Union di Ladins de Fascia, che se cruzia de la valorisazion de nosc lengaz, la spenc sui joegn e su la neva generazions, la é semper a la leta per troèr fora neva proponetes e soluzions inovatives per slarièr fora la cultura ladina e l zil che la se à metù dant l’é chel de ruèr maormenter te la comunanza per fèr crescer sia identità, se arvejinan semper de più ai gregn del doman.

Coi social se se arvejina a la jent
Per proèr a fèr chest, l’Union l’à dezidù de se ativèr ence duran miec i canai social che, te noscia sozietà, i ciapa semper più pe. N gran travert de chest vers l’é stat arjont enstadì: la piata Facebook, averta a la fin del 2013 ma durèda ativamenter demò ti ultimes dotrei egn, l’à arjont più che 720 »Me pièsc«. Con un di ultimes post l’é stat arjont enscinamai beleche treimile persones. La piata Instagram, averta acà dotrei meisc, la pel contèr presciapech 200 followers.
Su chisc canai dotrei outes en setemèna vegn publicà curiositèdes en cont de la cultura, aveniments enteressanc e particolères che la maor pèrt de la jent no cognosc, cianties per fascian portèdes dant da joegn e joenes de Fascia. Vegn metù sù ence costions amò de atualità con la patofies de Manuel Riz vegnudes fora sui Almanaches di egn passé. Vigni lunesc e vigni vender se pel veder la sumèda del sfoi de La Usc de la setemèna e l concors del retrat e da chesta setemèna l’é ence n’autra neva: vigni mèrtesc vegn portà dant l jech de paroles encrojèdes e vegn premià chi che troa la dreta soluzion.
I aministradores di canai vèrda semper de creèr contegnui de calità e curiousc, i prejentan a na vida gustegola e ladina, duran emoticon, fotografìes e pensieres che abie impat sul vijitador de la piates.
Chisc canai i é de gran valuta ajache l’é mesi de comunicazion anter l’Union e sia comunanza: ve envion donca duc a ge jir dò, per restèr semper agiorné su la novitèdes e vegnir en contat con mizacoles de nosc mond fascian.

Sit agiornà per descorir la novitèdes
Apede a chest lurier leà ai social, l’é tacà ence l lurier de agiornament del sit Internet de l’Union di Ladins de Fascia. L sit l’é dassen emportant ajache l’é l canal de comunicazion direta co la comunanza e de informazion ofizièla, de chel che se pel se emprevaler per slarièr fora i comunicac o la neves. L’é ence na vedrina su l’atività portèda inant a na vida trasparenta. Se pel veder ence la publicazions outes a la difujion de la cultura e de la letradura ladina. Ve envion donca a vijitèr l sit ladinsdefascia.it e a ve enscinuèr a la newsletter.

Per l davegnir se chier joegn inovatives
E se l’Union la proa semper de più a se oujer ai joegn, l’é dassen emportant che la tole ite en pruma persona joegn, che abie idea inovatives e fresces, al pas con i tempes.
Apontin chest uton sarà la litazions per l nef consei e, apontin per chesta ocajion, l’Union la é dò a binèr n grop de joegn atives da duta la Val che abie voa de se meter a la leta te chest ambit e che i abie l gust per noscia tradizions: l’obietif no l’é chel de mudèr l spirit de la sociazion, ma de vardèr al davegnir con n eie più ascort!
Se ence tu te aesses voa de tor pèrt a chest nef projet, te dèr jù per tia comunanza, te confrontèr con na neva endesfida o ence demò portèr tia opinion e consei, te pes contatèr l’Union di Ladins de Fascia, chiaman al numer de ofize 0462 764545 o travers la joena Nicoletta Riz, che la dò che la se dèsc jù per meter ensema n grop de joegn che posse portèr na ventèda de novità te l’Union di ladins de Fascia.


Scrivete ite a noscia newsletter.

enscinuete descancelete
Privacy
ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy