facebook

Sorastant: na encèria emportanta e delicata

L’Union di Ladins de Fascia domana che chesta nomina strategica per l davegnir de la Scola e de duta la comunanza de Fascia vegne fata con atenzion tegnan cont de la realtà de noscia val

Tel meis de aost la professora Mirella Florian fenirà sia encèria desche Sorastanta, dò 12 egn de empegn a la vida de la Scola Ladina de Fascia. Chi vegnarèl nominà a so post te chest ruol tant emportant per l davegnir, no demò de la Scola ma de duta la comunanza de Fascia?
Aldò de la Lege Provinzièla nr 5 dai 7 de aost 2006 sul sistem educatif de istruzion e formazion del Trentin, l Sorastant é nominà da la Provinzia en cordanza con l Comun General de Fascia, anter l personal scrit ite a l’albo di dirigenc de la istituzions scolastiches e formatives e en possess de l’atestat de cognoscenza del ladin, o en alternativa pel vegnir dat sù na encèria de 5 egn, da poder renovèr, a chi che venc n concors per titoi e ejames endrezà aposta o fat n contrat de lurier de regnèda fin a 5 egn a na persona che à i requisic pervedui. 
Fin ades no se sà amò nia de ofizial che sie stat fat vèlch vèrech per chesta nomina tant emportanta, alincontra l’é jit stroz la ousc che la direzion de duta la Scola de Fascia podessa vegnir data sù »en reggenza« al dirigent che cogn jà se cruzièr de la Scola autes de Fiem.
Per chest l’Union di Ladins de Fascia enstadì l’à manà na letra a la Procuradora del Comun General de Fascia e a l’assessor e al dirigent a l’istruzion de la Provinzia de Trent.  

Chest l test de la letra.
»Ti ultimes egn la comunanza de Fascia à arjont desvalives obietives emportanc te l’ambit scolastich e educatif con la creazion e l svilup de la Scola Ladina de Fascia, n istitut gran e compless, che tol ite duc i livìe educatives e de istruzion de Val, da la scolina fin ai trei licees, per n total de presciapech 1400 scolees e studenc e 200 dipendenc. Chesta Scola se desferenzia dai etres istituc provinzièi ajache la respon a la finalitèdes de stravardament e promozion de la mendranza linguistica ladina perveduda da la normes, per chest l’à na organisazion particolèra scrita dant te la L.P. n.5/2006.
Saon che la Sorastanta professora Mirella Florian, che à vidà la Scola Ladina de Fascia con gran empegn, pascion e competenza per 12 egn, la fenirà sia atività de lurier l meis che vegn e pisson che chel de sia sostituzion sie n passaje n muie emportant e delicat per duta la comunanza ladina de Fascia.

Sion dassen spervaji che la Scola Ladina de Fascia, per sia dimenscions, sia complessità e sia spezifizità ladina, la cogne aer n/na Sorastant/a con competenza e con cognoscenza de la realtà del post, che posse se dedichèr a temp pien a chesta encèria emportanta per l davegnir de noscia Val.
L’Union di Ladins de Fascia creit donca che sie besegn de gran atenzion per la nomina de chesta fegura, tegnan en conscidrazion i fatores porté dant chiò de sora, col cerner da la graduatoria di dirigenc scolastics na persona con l’atestat de cognoscenza del lengaz e de la cultura ladina e, se chest no fossa possibol, ge dèr te man la vida de la Scola de Fascia a n/na dirigent/a con la competenzes domanèdes che posse se dedichèr a temp pien al sistem formatif de noscia comunanza de mendranza, spetan che vegne metù a jir n concors ad hoc descheche l’é pervedù da la normativa.«

Scola Ladina de Fascia

ladinoitaliano

Union di Ladins de Fascia - Strada Dolomites, 22 - 38039 Vich/Vigo di Fassa (TN) - tel. / fax +39 0462 764545 - union@ladinsdefascia.it - Privacy